ភ្នំពេញ៖ កាលពីថ្ងៃទី២៩ ខែតុលា ឆ្នាំ២០២៣ អាជ្ញាធរបានឃាត់ខ្លួនជនសង្ស័យម្នាក់ដែលបន្លំខ្លួនជាខ្សែព្រះញាត្តិវង្ស និងក្លែងបន្លំជាព្រះរាជសារប្រគេន និងនិមន្ត ព្រះតេជគុណ វន វាសី ចន្ទមុនី មកសម្តែងព្រះធម៌ទេសនា ដែលបង្ហោះចែកចាយក្នុងបណ្តាញសង្គមកាលពីថ្មីៗកន្លងទៅនេះ។ ក្រោយមកក្រសួងព្រះបរមរាជវាំងបដិសេធចំពោះលិខិតក្លែងបន្លំជាព្រះរាជសារនោះដែលចុះនៅថ្ងៃទី២៤ ខែតុលា ឆ្នាំ២០២៣។

ជនសង្ស័យឈ្មោះ ហាក់ ឧត្តម បានសារភាពថា ខ្លួនពិតជាបានរៀបចំបង្កើតលិខិតក្លែងបន្លំជាព្រះរាជសារប្រាកដមែន ដោយបន្លំខ្លួនជាខ្សែព្រះញាតិវង្ស ទៅជួលសេវាវាយអត្ថបទតាមកុំព្យូទ័រមួយកន្លែងនៅម្តុំ វិទ្យាល័យសម្តេចជាស៊ីមសន្ធរម៉ុក ដោយខ្លួនជាអ្នកផ្តល់នូវខ្លឹមសារ និងឯកសារគំរូ រួចផ្ញើលិខិតនោះទៅកូនសិស្សលោកនៅវត្តចន្ទប្បជោត្តនារាម ដើម្បីនិមន្តព្រះធម្មវនវាសី ចន្ទមុនី ទៅសម្តែងធម៌ទេសនាក្នុងព្រះរាជពិធីបុណ្យកឋិនទាន នៅវត្តទេពវិមាន ហៅវត្តកាន់ទ្រង់ ស្ថិតនៅឃុំតានី ស្រុកអង្គជ័យ ខេត្តកំពត ដើម្បីទទួលបានផលប្រយោជន៍ពីការរៀបចំកម្មវិធីបុណ្យកឋិនទាន។

អគ្គស្នងការដ្ឋាននគរបាលជាតិ បានអំពាវនាវដល់សាធារណជនប្រុងប្រយ័ត្នចំពោះការចែករំលែកនូវព័ត៌មានគ្មានប្រភពច្បាស់លាស់ ដែលបណ្តាលអោយខ្លួនក្លាយជាឈ្នាន់បម្រើដល់ឧបាយកលរបស់ក្រុមជនឆបោក ព្រមទាំងត្រូវទទួលខុសត្រូវចំពោះច្បាប់ថែមទៀត៕